YANGA KUTUMIA SILAHA ZAKE LEO DHIDI YA 3 PILLARS

Mabingwa wa Ligi Kuu ya Soka Tanzania Bara, Yanga  (Pichani) leo watashuka dimbani kuikaribisha 3Pillars ya Nigeria katika mechi yao ya kirafiki kwenye uwanja wa Taifa jijini Dar es Salaam.


Akizungumza jana, mratibu wa mechi hiyo, Jerry Matwanga, alisema kuwa lengo la mechi hiyo ni kuendelea kuwapa maandalizi mabingwa hao wamaojiandaa kutetea ubingwa wao.

Alisema kuwa Yanga itatumia changamoto itakayokutana nayo katika mchezo huo kujiweka imara na kujiandaa na ushindani.

Awali, 3Pillars walizuiwa kucheza mechi yoyote nchini hadi pale Shirikisho la Soka Tanzania (TFF) lilipojiridhisha kwa kuhakikishiwa ujio wa timu hiyo na wenzao wa Shirikisho la Soka la Nigeria (NFF).

Yanga baada ya mechi hiyo inatarajiwa kujichimbia kambini nje ya jiji kujiandaa na mechi yake ya Ngao ya Jamii dhidi ya Azam itakayofanyika Agosti 17.