Simba yaendelea kupigwa danadana fedha za Okwi

Danadana kuhusiana na malipo yatokanayo na mauzo ya mshambuliaji wa zamani wa Simba, Mganda Emmanuel Okwi aliyehamia Etoile Du Sahel ya Tunisia zimechukua sura mpya baada ya uongozi wa 'Wekundu wa Msimbazi' kusema kuwa sasa wana matumaini ya kulipwa haki yao ifikapo Septemba mwaka huu

.Awali, kupitia barua iliyoandikwa Machi 13, 2013 na Katibu Mkuu wa Etoile, Adel Ghith kwenda kwa rais (mwenyekiti) wa Simba, ilielezwa kwamba fedha za Okwi kiasi cha dola za Marekani 300,000 (Sh. milioni 480) zingelipwa ndani ya kipindi kifupi kuanzia wakati huo kwani tatizo kubwa lilikuwa ni kupata idhini ya Benki Kuu ya Tunisia ili kukamilisha muamala wa malipo ya fedha hizo za kigeni kwenda Simba.

Hata hivyo, akizungumza na mtandao huu jana baada ya kurejea nchini akitokea Tunisia,  Mwenyekiti wa Kamati ya Usajili ya Simba, Hanspoppe Zacharia, alisema kuwa Etoile imedai kuwa ilikwama kulipa fedha hizo kwavile ilikuwa ikicheza mechi zake bila mashabiki kufuatia vurugu zilizowafanya waadhibiwe na Shirikisho la Soka la Afrika (Caf).

Alisema mazungumzo ambayo yamefanyika wakiwa huko kuhusiana na Okwi yamewasilishwa katika Shirikisho la Soka la Kimataifa (FIFA) na sasa Etoile wameahidi kutekeleza ahadi ya kulipa fedha hizo.

 

Hanspope aliongeza kuwa baada ya klabu yao kupata malipo hayo, watakamilisha masuala mbalimbali ya utendaji yaliyokwama ambapo Simba nayo ilikuwa inapata mapato ya milangoni 'kiduchu' kutokana na kufanya vibaya kwenye mzunguko wa pili wa ligi kuu ya Tanzania Bara.

 

"Tumezungumza na kila tulichokubaliana tumekiwasilisha FIFA kwa maandishi, wenzetu (Etoile) walijitetea kwamba mapato yao yalipungua hivyo fedha walizokuwa wanategemea ni kupitia katika majengo ya hoteli na maduka, ila za milangoni ambazo huwa ni nyingi hawakuwa nazo kutokana na kucheza bila mashabiki," alisema Hanspoppe.

 

Wakati huo huo, wachezaji wa Simba wanaendelea na mazoezi chini ya kocha wao mpya, Abdallah Kibadeni kwenye Uwanja wa Kinesi jijini Dar es Salaam wakati wachezaji yosso jana walihamia kwenye uwanja wa Mwenge Shooting wakiwa chini ya beki wa zamani wa timu hiyo, Amri Said.