Boban, Nyosso waanza maisha mapya rasmi Coastal Union

Kiungo, Haruna Moshi 'Boban'

 

UONGOZI wa timu ya Coastal Union jana ulitangaza hadharani kuwasajili nyota wapya saba kwa ajili ya kuitumikia klabu hiyo katika msimu ujao wa Ligi Kuu ya Soka Tanzania Bara akiwamo kiungo, Haruna Moshi 'Boban' kutoka Simba ya jijini Dar es Salaam
.

Boban alianza kujiunga na Coastal Union muda mfupi baada ya kiungo huyo na wenzake sita kusimamishwa na uongozi wa Simba kwa kosa la utovu wa nidhamu.

Boban amesaini mkataba wa mwaka mmoja na mabingwa hao wa mwaka 1988 wa ligi ya Bara, klabu ambayo aliwahi kuichezea kabla ya kujiunga na Simba.

Mkurugenzi wa timu hiyo, Nassor Bin Slum, alimtangaza pia beki wa kati Juma Nyosso kuwa amesaini mkataba wa mwaka mmoja na timu yao huku waliosaini mikataba ya miaka miwili ni pamoja na Othman Ally kutoka Zanzibar, Hemedi Masumbuko, Said Lubawa wa JKT Oljoro ya jijini Arusha.

Bin Slum alisema kuwa pia wamewapandisha wachezaji sita yosso kutoka timu B ambao anaamini wataongeza changamoto kwenye kikosi hicho kilichodhamiria kutoa ushindani katika msimu ujao wa ligi.

Hata hivyo, kiongozi huyo alikana mipango ya kutaka kuwasajili Juma Kaseja na Amri Kiemba wote kutoka Simba.

Alisema pia wamebakiza nafasi mbili za kusajili ambazo wanatarajia kusajili wachezaji kutoka nje ya nchi katika nafasi ya ushambuliaji.

Coastal Union ilimaliza ikiwa ya sita katika msimamo wa ligi ambapo Yanga ilitwaa ubingwa huo uliokuwa unashikiliwa na watani zao Simba.