Azam ina wachezaji watano wa kigeni ambao ni raia wa Ivory Coast, Kipre Bolou na Kipre Tchetche ambaye ni mfungaji bora wa msimu uliopita, Wakenya Joackins Atudo na Humphrey Mieno na Mganda Brian Umony.
Akizungumza jana jijini Dar es Salaam jana, Meneja wa Azam, Patrick Kahemele alisema bodi ya 'Wanalambalamba' itakutana kujadili suala hilo.
"Suala hilo ni zito, siwezi kulitolea maelezo kwa sasa (jana). Bodi ya klabu itakaa kulijadili ili tujue wachezaji wawili watakaopunguzwa na hatua nyingine za kuchukua," alisema Kahemele.
Mapema jana, Mwenyekiti wa Kamati ya Ligi ya Shirikisho la Soka (TFF), Wallace Karia aliliambia gazeti hili jijini Dar es Salaam kuwa kamati za usajili za klabu zinazoshiriki Ligi Kuu ya Tanzania Bara zinapaswa kuzingatia kanuni katika kusajili wachezaji.
TFF kupitia kwa afisa habari wake, Boniface Wambura imeshaeleza kuwa kuanzia msimu wa 2013/14, kila klabu inayoshiriki Ligi Kuu ya Tanzania Bara itatakiwa kuwa na wachezaji wa kigeni wasiozidi watatu ili kutekeleza walichokubaliana na klabu katika mkutano uliofanyika jijini Dar es Salaam 2010 kupitisha Azimio la Bagamoyo ambalo linataka kila klabu kuwa na nyota wa kigeni wasiozidi watatu ili kuwapa nafasi zaidi ya kucheza wachezaji wazawa.
Klabu za Simba na Yanga pia ni waathirika wakubwa wa maamuzi hayo kwani msimu uliopita zilisajili wachezaji wa kigeni zaidi ya watatu.
Msimu uliopita ambao klabu zilikuwa zinaruhusiwa kuwa na wachezaji wa kigeni wasiozidi watano, Yanga ilikuwa na Yaw Berko wa Ghana, Haruna Niyonzima 'Fabregas' na Mbuyu Twite (Rwanda), Didier Kavumbagu (Burundi) na Mganda Hamis Kiiza.
Simba ilikuwa na Waganda Mussa Mude na Emmanuel Okwi ambaye baadaye aliuzwa katika klabu ya Etoile du Sahel ya Tunisia, Pascal Ochieng (Kenya), Komalbil Keita (Mali), Daniel Akuffor (Ghana) na Mzambia Felix Sunzu.