Simba yamchukua mganga wa Mtibwa

Simba wameendelea kuibomoa Mtibwa Sugar, baada ya kumchukua Daktari wa timu hiyo, Yassin Gembe ili kurithi mikoba ya Cosmas Kapinga aliyeondoka katika klabu hiyo.

Hivi karibuni klabu ya Simba ilimsajili beki wa kushoto wa Mtibwa, Issa Rashid kwa ajili ya kuimarisha kikosi chao kwa ajili ya msimu ujao wa Ligi Kuu Tanzania Bara.

Kapinga ameamua kuondoka katika klabu hiyo baada ya kupata kazi katika taasisi moja hapa nchini ambayo ina masilahi makubwa kuliko Simba. Dokta mpya wa Simba, Gembe alisema kuwa kilichomleta Simba ni maslahi na siyo kingine na ana amini atafanya kazi yake kwa umakini zaidi.

Kwa muda mrefu klabu ya Simba na Mtibwa Sugar zimekuwa na tabia ya kubadilishana wachezaji hasa wale wa kutolewa kwa mkopo katika miaka ya hivi karibuni.