Katiba ya TFF kurekebishwa Julai 13

Rais wa Shirikisho la Soka nchini, Leodegar Tenga ametoa notisi kwa wajumbe wa Mkutano Mkuu Maalumu wa TFF utakaofanyika Julai 13 mwaka huu kwenye ukumbi wa NSSF Waterfront jijini Dar es Salaam ukiwa na ajenda moja tu -- marekebisho ya Katiba
.
Akizungumza na waandishi wa habari jijini Dar es Salaam jana, Ofisa Habari wa TFF, Boniface Wambura alisema Tenga, ambaye pia ni Rais wa Shirikisho la Vyama vya Soka Afrika Mashariki na Kati (CECAFA), ameitisha mkutano huo baada ya kupata maagizo kutoka Shirikisho la Kimataifa la Soka (FIFA).

FIFA iliandika barua hiyo Aprili 29 mwaka huu iliyofuta kuvurugika kwa mchakato wa Uchaguzi Mkuu wa TFF na kuagiza kufanyika kwa marekebisho ya katiba ya shirikisho hilo. 

 

"Ajenda rasmi na taarifa nyingine zitatumwa kwa wajumbe siku 15 kabla ya Mkutano huo kwa mujibu wa Ibara ya 25(4) ya Katiba ya TFF. Wanachama wa TFF ambao ni vyama vya mikoa, vyama shiriki na klabu za Ligi Kuu wanatakiwa kutuma majina ya wajumbe halali," alisema Wambura.

 

"TFF inapenda kuwakumbusha wanachama wake kutuma majina ya wajumbe halali ili kufanikisha maandalizi ya Mkutano huo. Ni vizuri kuhakikisha kuwa jina linalotumwa ni la mjumbe halali wa Mkutano Mkuu kwa mujibu wa Katiba ya TFF."

 

FIFA ilifuta mchakato wa Uchaguzi Mkuu wa TFF na kuagiza kufanyika kwa marekebisho ya katiba ya shirikisho hilo ili kuingiza kipengele cha kuwapo kwa Kamati ya Maadili baada ya wagombe wawili,

 

Jamali Malinzi (nafasi ya urais) na Maichael Wambura (makamu wa rais) kuliomba shirikisho hilo  kuingilia mchakato wa uchaguzi huo kwa madai kuwa kanuni zilikiukwa.