Mrisho Ngassa, Nadir Haroub 'Cannavaro', Didier Kavumbagu na Haruna Niyonzima kila mmoja alifunga goli moja wakati mabingwa hao wa Ligi Kuu ya Tanzania Bara walipopata ushindi kama wa mahasimu wao Simba juzi dhidi ya Waganda hao.
Ngassa, ambaye amerejea Yanga akitokea Simba katika uhamisho wenye utata ambao utatolewa maamuzi na TFF kesho, alifunga goli la kuongoza la wenyeji katika dakika ya 7 kwa shuti la mbali lililomshinda kipa wa Villa, Elungat Martins.
Hata hivyo, goli hilo lilidumu kwa dakika 11 wakati Siraj Jamal alipoisawazishia Villa baada ya kutokea piga nikupige langoni mwa Yanga na mabeki wa klabu hiyo ya Jangwani kushindwa kujipanga.
Wenyeji walirejesha uongozi wao katika dakika ya 27 pale Cannavaro alipoifungia Yanga goli la pili kwa shuti la mbali baada ya kiungo Mnyarwanda Niyonzima kumuanzishia 'fri-kiki' kwa pasi fupi.
Mshambuliaji raia wa Burundi, Kavumbagu aliifungia Yanga goli la tatu katika dakika ya 30 akiusukumia wavuni mpira uliorudi baada ya shuti la Tegete kugonga 'besela' huku kipa wa Villa akiwa amepoteza maboya na kutoka katika eneo lake.
Matokeo ya 3-1 yalidumu hadi wakati wa mapumziko ya mechi hiyo ambayo wachezaji wa Villa walionekana hawaelewani huku kipa wao akishindwa kuwa mwepesi kutokea na kuzuia mashambulizi ya Yanga.
Dakika tano baada ya kipindi cha pili kuanza, Niyonzima alikaribia kuifungia Yanga goli la nne lakini shuti lake lilipanguliwa kiufundi na kipa wa Villa, Martins, na kisha Tegete kupiga nje mpira uliorudi na kumkuta katika nafasi ya kufunga.
Niyonzima aliifungia Yanga goli la nne katika dakika ya 61 baada ya kuwazidi kasi mabeki wa Villa na kupiga mpira kushoto mwa kipa na kutinga wavuni.
Villa walikuwa na nafasi ya kupunguza idadi ya magoli katika dakika ya 67 wakati Ronald Muganga alipomtoka beki wa kati Cannavaro lakini akachelewa kupiga shuti na kumruhusu kipa wa Yanga, Ally Mustapha 'Barthez' kuuwahi mpira na kuudaka.
Villa ambayo ilitisha miaka ya nyuma ikizinyanyasa timu za Tanzania, juzi pia ilikumbana na kipigo cha magoli 4-1 kutoka kwa Simba kwenye uwanja huo huo.
Katika mechi zilizopita Yanga, ilizifunga timu za Mtibwa Sugar (3-1) na 3Pillars ya Nigeria (1-0) kwenye uwanja huo pia.
Yanga: Ally Mustapha 'Barthez', Juma Abdul, David Luhende/ Oscar Joshua (dk.67), Nadir Haroub 'Cannavaro', Kelvin Yondani/ Rajab Zahir (dk.55), Athuman Idd 'Chuji'/ Bakari Masoud (dk.67), Mrisho Ngassa, Salum Telela, Didier Kavumbagu, Jerry Tegete/ Husein Javu (dk.66) na Haruna Niyonzima/ Said Bahanunzi (dk.66).
Villa: Elungat Martins/ Luyma Sulait (dk.61), Kaggwa Andrew, Baganza Henry, Kabanda Mike, Kisalita Ayub, Ssempa Charles, Ndaula Moses, Semboty Godfrey, Siraj Jamal, Muganga Ronald na Kayoya Emima.