YANGA YAISOGEREA SIMBA MKIANI........NGASA AKAMATIKI

Winga Mrisho Ngasa alifunga goli lake la kwanza tangu arejee Yanga na akampikia jingine Didier Kavumbagu wakati alipoiongoza klabu yake hiyo ya Jangwani kushinda 2-0 dhidi ya timu ngumu ya Mtibwa Sugar kwenye Uwanja wa Taifa jijini Dar es Salaam jana.


Ngasa aliyekuwa akicheza mechi yake ya pili Yanga tangu amalize kutumikia adhabu ya kufungiwa mechi sita kutokana kusaini mkataba ambao alioukana na Simba, alihitaji dakika tano tu za kwanza jana kuifungia Yanga goli la kuongoza.

Aliwainua vitini mashabiki wa klabu hiyo ambayo amekuwa akisema anaipenda kutoka moyoni, baada ya kufunga kwa shuti la mguu wa kushoto akimalizia mpira mrefu uliopigwa na beki Kelvin Yondani ukababatizwa na mshambuliaji Mrundi Didier Kavumbagu kabla ya kumfikia mfungaji ndani ya boksi ambaye alimlamba chenga kipa wa Mtibwa, Hussein Shariff 'Casillas', na kufunga katika lango tupu.

Yanga ambayo ilianza msimu kwa kusuasua ikitoka sare tatu mfululizo na kupoteza mechi moja katika mechi sita za kwanza, ilionyesha kuwa imedhamiria kutetea ubingwa wao wa Ligi Kuu ya Tanzania Bara kwa kuendelea kulishambulia lango la Mtibwa mfululizo.

Mfungaji bora wa Yanga kwa msimu uliopita, Kavumbagu alipoteza nafasi muhimu kuifungia timu yake goli la pili wakati shuti lake lilipogonga nguzo ya lango akiwa ndani ya boksi.

Dakika sita baadaye, Kavumbagu alirekebisha makosa yake kwa kuifungia Yanga goli la pili akimalizia kwa mguu wa kulia krosi murua ya nyota wa timu ya taifa (Taifa Stars), Ngasa.

Mshambuliaji Mganda Hamis Kiiza alikosa goli la wazi akiwa ndani ya sita wakati akiunganisha krosi bomba ya Mtokea benchi Nizar Khalfani katika dakika ya 68 na kipa wa Yanga, Ali Mustapha 'Barthez' alifanya kazi ya ziada kuokoa shuti la mtokea benchi Juma Luizio kufuatia kona ya dakika ya 78.

Kocha wa Mtibwa Mecky Mexime alisema timu yake iliponzwa na kujisahau kwa
Inatoka uk. 24

mabeki katika dakika 25 za kwanza na akawalaumu washambuliaji wake kwa kupoteza nafasi kadhaa za kufunga.
Ushindi umeifanya Yanga kukwea hadi nafasi ya pili katika msimamo ikiwa na pointi 12, tatu nyuma ya vinara Simba baada ya zote kucheza mechi saba.

Katika mechi nyingi iliyochezwa jana, Prisons iliifunga Mgambo 1-0 kwenye Uwanja wa Mkwakwani, Tanga.

Vikosi vya kwanza kwenye Uwanja wa Taifa jana; Yanga: Ali Mustapha 'Barthez', Mbuyu Twite, David Luhende, Nadir Haroub 'Cannavaro', Kelvin Yondani, Athuman Idd 'Chuji', Simon Msuva, Frank Domayo, Didier Kavumbagu, Hamisi Kiiza na Mrisho Ngasa.

Mtibwa: Hussein Shariff 'Casillas', Hassan Ramadhan, Paul George, Salvatory Ntebe, Salim Abdallah, Shaban Nditi, Ally Shomari, Awadh Juma, Mussa Mgosi, Shabani Kisiga na Vincent Barnabas