Timu hiyo itajitupa uwanjani kuvaana na Mbeya City ikiwa imetoka kwenye maumivu ya kuchezea kipigo cha bao 1-0 dhidi ya JKT Mgambo, mechi iliyochezwa kwenye Uwanja wa Mkwakwani, Tanga baada ya kutoka sare ya 1-1 na Mtibwa Sugar mkoani Morogoro.
Simba yenye pointi 31 inahitaji ushindi wa aina yoyote ile ili ijiwekee mazingira mazuri ya ubingwa unaowaniwa na Azam FC wenye pointi 36, Yanga 35 na Mbeya City 34.
Logarusic alisema kuwa anatarajia kuvaana na moja ya timu ngumu na yenye ushindani inayowania ubingwa katika msimu huu, hivyo hatarajii kupata wepesi katika mechi hiyo kutokana na ubora wa kikosi chao.
Logarusic alisema, Mbeya City inaundwa na wachezaji wengi chipukizi wenye kazi na morali ya hali ya juu na wanaocheza kitimu, hivyo anaendelea kukinoa kikosi chake kwa kuangalia sehemu zenye upungufu kwa ajili ya kuziimarisha kabla ya kuwavaa wapinzani wake.
“Mechi ya Mbeya City ni ngumu kutokana na ubora wa timu yao inayocheza pamoja na kujituma kwa kila mmoja kutimiza majukumu yake ndani ya uwanja, hivyo tuna kibarua kigumu katika kupata ushindi kwenye mechi hiyo.
“Siyo timu nyepesi ya kuidharau hakuna mtu asiyeijua, ni kati ya timu inayowania ubingwa huu wa ligi pamoja na klabu kubwa za Simba, Yanga na Azam FC, nitajitahidi kuimarisha kikosi changu ili tuhakikishe tunapata matokeo mazuri katika mechi hiyo.”