YANGA KAMBINI JULAI 3 MWANZA, MBIONI KUSAJILI WANIGERIA WAWILI

YANGA imeamua kusuka kikosi chake cha Ligi ya Mabingwa Afrika kwa kuanzia na nchi mbili zilizoko kwenye tano bora ya Afrika kwenye viwango vya Fifa na itaingia kambini rasmi Julai 3 ikipiga kambi ya wiki mbili jijini Mwanza ambako kuna uwanja mzuri wa CCM Kirumba.

Mabingwa hao wa Tanzania wamekabidhiwa majina matatu na wakala waliyempa kazi ya kuwatafutia wachezaji wa kigeni.

Mastraika wawili ni kutoka Nigeria ambayo ni ya nne Afrika na 31 duniani na mwingine ni wa Ghana iliyoko nafasi ya pili Afrika na ya 21 duniani kulingana na viwango vipya vya Fifa vilivyotoka mwezi huu.  

Mwenyekiti wa Usajili wa Yanga, Abdallah Bin Kleb licha ya kutotaja majina ya wachezaji hao kwa madai kuwa bado hawajafikia muafaka, alisema wamepewa masharti na matakwa ya wachezaji hao na kwamba wanajadiliana kabla ya kupata muafaka wa jina mmoja.

Bin Kleb alisema lengo lao kubwa ni kupata straika mwenye nguvu, machachari, umri mdogo, akili ya kufunga na mpambanaji kama ilivyokuwa kwa Mzambia Davies Mwape ambaye aliachwa msimu uliopita kutokana na umri.

Kiongozi huyo mwenye ushawishi mkubwa ndani ya Yanga alisema wamepania kusajili mchezaji kwa kuangalia ubora wa nchi yake na wako tayari kumlipa ilimradi ajue kutumbukiza langoni.

“Hatutamtangaza mchezaji,  tunataka kufanya kama ilivyokuwa kwa Haruna Niyonzima na Mrisho Ngassa ambao walitambulishwa wakiwa tayari wamesaini mkataba na klabu yetu, tupo makini sana katika suala hili,” alisema Bin Kleb.

“Unajua madhara yake, unaweza kuharibu mikakati yako ya kumpata mchezaji huyo, sisi tuna wakala siku hizi ambaye anafanya kazi hiyo kama klabu za Ulaya, wakala wetu akikamilisha mazungumzo na kukubali ofa yetu, tutasaini mkataba na kuweka mambo hadharani kama ilivyokuwa kwa wachezaji wengine,” alisema.

Alisema kuwa wachezaji hao ni wazuri na wanalingana kwa viwango vyao, ila jambo ambalo limewafuraisha ni jinsi walivyokuwa wapambanaji uwanjani na hasa katika kufunga mabao.

“Tunataka mabeki wakitoka uwanjani wawe wanasimulia wenyewe kuwa wamekumbana na  straika mwenye kila kitu au akitoka mapumziko asiwe na hamu ya kurejea tena uwanjani kipindi cha pili, huu ndiyo mkakati wetu kwa sasa na tunataka timu ya Ligi ya Mabingwa Afrika na wala si vinginevyo,” alisema.

Alisema Yanga itaondoka Julai 3 kwenda Mwanza kwa ajili ya kambi na mechi za mazoezi na watakaa huko kwa muda wa wiki mbili.

Kama Yanga, itampata straika huyo ina maana kuwa kati ya Yaw Berko au Kabange Twite itabidi aondolewe katika orodha ya wachezaji wa kigeni ili kubakiwa na watano tu.