UJIO WA VIDEO YA SALAMU ZAO YA NEY WAKAMILIKA

MKALI wa hip hop nchini, Emmanuel Elibariki ‘Ney wa Mitego’(Pichani)  anatarajiwa kuachia video ya kazi yake mpya inayokwenda kwa jina la ‘Salamu Zao’ hivi karibuni.


Ney ambaye hivi sasa anafanya vizuri katika soko la muziki, ameamua kufanya kazi hiyo kwa lengo la kuburudisha na kuwaelimisha wapenzi wa kazi zake.

Akizungumza jijini Dar es Salaam juzi, Ney alisema kazi hiyo inatarajiwa kuanza kusambazwa wiki ijayo na tayari ameikamilisha.

“Wiki ijayo nitaanza kuisambaza kazi hii vituo mbalimbali vya televisheni, mashabiki wanatakiwa kuipokea, kwani ni bonge la kazi kama wanavyonijua mashabiki wangu, sijawahi kufanya vibaya katika kazi zangu, naomba tu wakae mkao wa kula kwa ajili ya kuipokea,” alisema.

Ney alishawahi kutamba na kazi zake kama ‘Muziki Gani’ aliomshirikisha Diamond, ‘Hello’ na nyinginezo ambazo zilifanya vizuri katika vituo mbalimbali vya redio.