"Huenda likaonekana kama wazo la kijinga, lakini kwa maoni yangu, huyu ni Guardiola mpya," Lindegaard aliambia BBC Sport Jumanne.
"Yale tumeyaona wiki ya kwanza yamekuwa na ushawishi sana. Yanafanana sana na Sir Alex Ferguson na ni wazi kwamba Ryan Giggs amejifunza kutoka kwa mmoja wa makocha wa soka walioheshimiwa zaidi katika historia.”
Giggs, anayeshikilia rekodi ya kuchezea United mechi nyingi zaidi, aliwekwa kwenye usukani kwa muda wiki iliyopita baada ya David Moyes kufutwa kazi miezi 10 pekee baada ya kuanza kutumikia mkataba wake wa miaka sita kama mrithi wa Ferguson.
Mechi yake ya kwanza uongozini, Giggs alifanikisha ushindi wa 4-0 nyumbani dhidi ya Norwich City, na Lindegaard anasema kiungo huyo wa kati wa miaka 40 aliwapendeza wachezaji wenzake.
"Baadhi wanaweza kuuliza maswali kuhusu kama unaweza kubadilika kutoka mchezaji siku moja na kesho uwe meneja. Kawaida, ninaweza kuwa na shaka pia, lakini kuhusu Giggs, mambo ni tofauti,” raia huyo wa Denmark akaongeza.
"Hotuba yake ya majuzi zaidi, kabla ya timu kwenza uwanjani mechi ya Norwich, ilifanya nywele zangu zisimame kwa njia ambayo niliwahi tu kuhisi chini ya Sir Alex Ferguson: 'Msiwavunje moyo mashabiki!'"
Giggs anaripotiwa kutopigania nafasi ya kumrithi Moyes kwa njia ya kudumu United, huku kocha wa Uholanzi Louis van Gaal na kocha wa Real Madrid Carlo Ancelotti wakiwa miongoni mwa wanaoongoza kupigania kazi hiyo.
Kocha wa sasa wa Bayern Munich, Guardiola alijizolea sifa kama mchezaji wa Barcelona kabla ya kuwa kocha 2008. Aliongoza klabu hiyo kushinda vikombe 14 kabla ya kujiuzulu miaka miwili iliyopita.