Akizungumza jana jijini, Mwenyekiti wa Chama cha Wachezaji wa Soka Nchini (SPUTANZA), Mussa Kissoky, alisema kuwa amepokea wito kutoka TFF na anatarajia atahudhuria katika kikao hicho kwa ajili ya kumtetea Singano ambaye ni mwanachama wao.
Kissoky alisema kwamba wanaamini tofauti zilizopo baina ya mchezaji na klabu zitamalizwa katika kikao hicho.
"Hatima ya Messi na Simba sasa itajulikana Jumamosi, tumeitwa katika kikao cha Kamati ya Sheria na Hadhi za Wachezaji, hiyo ndiyo kamati ya juu na ambaye hataridhika na maamuzi hayo inabidi aende Fifa," alisema mwenyekiti huyo wa SPUTANZA.
Kamati ya Utendaji ya Simba iliyokutana hivi karibuni iliamua kutofanya mazungumzo upya na Messi kama ilivyoagizwa na sekretarieti ya TFF.
Badala yake Simba iliamua kuliwasilisha suala hilo katika Kamati ya Sheria na Hadhi za Wachezaji huku ikisisitiza kwamba 'haijauchakachua' mkataba wa nyota huyo ambaye alianzia kuitumikia klabu hiyo katika timu ya vijana wa umri chini ya miaka 20 (Simba B).
Simba imesisitiza kwamba mkataba wa mchezaji huyo ambao ulisainiwa chini ya uongozi uliopita wa aliyekuwa mwenyekiti, Ismail Aden Rage, unamalizika mwakani, wakati mchezaji huyo anasema kwamba umeshamalizika.
Kufuatia tofauti hizo, Singano ameshindwa kufanya mazoezi ya pamoja na baadhi ya nyota wa Simba ambao wameanza kujinoa kwenye gym.
KOCHA KERR KUTUA
Habari kutoka ndani ya Simba zimeeleza kwamba kocha mkuu mpya wa timu hiyo, Muingereza, Dylan Kerr, anatarajiwa kutua nchini kati ya leo au kesho.
Chanzo kilisema jana pia kwamba tayari mshambuliaji wa kimataifa kutoka Kenya, Paul Kiongera, ameshawasili nchini tangu juzi na leo ataanza mazoezi ya viungo ambayo yanasimamiwa na kocha msaidizi, Selemani Matola.