SIMBA SASA KUMTIBU KIGGY MAKASY

Hatimaye kiungo wa klabu ya Simba ya jijini Dar es Salaam, Kiggy Makasy (Pichani), anatarajiwa kuondoka nchini Jumatatu ijayo ya Septemba 9 mwaka huu kwenda India kwa ajili ya kufanyiwa upasuaji wa goti la kulia imeelezwa jana na uongozi wa klabu hiyo.


Awali kiungo huyo alitarajiwa kuondoka nchini Agosti 18 mwaka huu na kwenda katika hospitali ya Saifee iliyoko India ili kufanyiwa upasuaji huo.

Makassy aliumia wakati Simba ilipokuwa mkoani Dodoma ikicheza mechi ya kirafiki dhidi ya CDA mwezi Aprili mwaka huu ambapo aliumia na kukaa nje ya uwanja tangu wakati huo.

Makassy akiwa India atafanyiwa matibatu ya kuurejesha sawa sawa mguu wake huo wa kulia uliochanika nyama ili aweze kurejea tena uwanjani.

Akizungumza jana jijini, Afisa Habari wa Simba, Ezekiel Kamwaga, alisema kuwa tayari maandalizi ya safari hiyo yamekamilika na kilichobaki ni kukutana na daktari wake na wanaamini baada ya matibabu atarejea kuitumikia timu yake.

Simba pia iliwahi kumpeleka kiungo wake mwingine, Uhuru Suleiman, kupata matibabu India baada ya kuvunjika mguu mwaka juzi.