YOUNG KILLER KUTAMBULISHA NGOMA MPYA

MSANII wa hip hop anaeuwakilisha mkoa wa Mwanza, Young Killer (Pichani) , anajipanga kuachia kazi yake mpya ambayo bado hajaipatia jina ambayo amefanya na chipukizi wa muziki huo anaejulikana kwa jina la ‘Dogo D’ mwenye umri wa miaka 11.


Akizungumza jijini Dar es Salaam jana, Young Killer, alisema wimbo huo bado hajaupatia jina kutokana na ubora wa mashairi ambayo yamesimama katika kazi hiyo.

“Huyu Dogo ambaye nimefanya naye kazi hii alikuwa anapenda sana kuimba na mimi siku nikaamua kukutana naye na kuamua kuimba naye, kiukweli dogo anajitahidi na ana sauti nzuri na anaweza pia,” alisema Young Killer.

Alisema anaomba mashabiki wake wampe sapoti katika wimbo huo ambao anaamini kuanza kuusambaza hivi karibuni katika vituo mbalimbali vya redio na televisheni ikiwa ni muendelezo wa kuwapa burudani mashabiki wake.

Young Killer kwa sasa anatamba na kibao chake cha ‘Jana na Leo’ ambacho amefanya na Stamin, mbali na kuwa na kibao kingine cha ‘Dear Gambe’ ambacho amemshirikisha mkali wa muziki huo, Abdenego Damian ‘Belle 9’, ambao ulimtambulisha na kufanya vizuri katika tasnia hiyo.