Beki wa Simba na timu ya Taifa ya Tanzania, Shomari Kapombe
amehairisha safari yake ya kufanya majaribio na timu ya FC Twente ya
Uholanzi ili aweze kuitumikia Taifa Stars katika mchezo wa CHAN dhidi
ya Uganda.
Kapombe ambaye alipaswa kuondoka nchini wiki
ijayo, alisema kuwa amekwisha wasiliana na wakala wake kuhusiana na
kuharisha kwa zoezi hilo na sasa atakwenda Uholanzi Julai 15 kuanza
majaribio.
Alisema kuwa mawazo yake yote kwa sasa ni kwenye
mchezo wa CHAN dhidi ya Uganda kwani wana usongo na timu hiyo ili kuweza
kusonga mbele katika mashindano hayo.
“Nilitakiwa niondoke wiki ijayo, lakini kutokana
na majukumu ya Timu ya Taifa, nimeamua kuahirisha safari hiyo na sasa
nataka kulitumikia taifa langu kwanza, nataka kuona tunafika wapi baada
ya kukosa nafasi ya kufuzu kwa ajili ya Fainali ya Kombe la Dunia ya
mwakani,” alisema Kapombe.
Alisema kuwa mechi dhidi ya Uganda ni muhimu sana
na wanatakiwa kupata ushindi mkubwa hapa nyumbani ili kuweka mazingira
mazuri katika mechi ya marudiano.
Alifafanua kuwa safari yake ya huko ipo chini ya
wakala mmoja wa kimataifa na mbali ya FC Twente ambayo inacheza Ligi Kuu
ya Uholanzi ijulikanayo kwa jina la Eredovisie, pia anatarajia kufanya
majaribio katika timu mbalimbali nyingine atakazopangiwa.
Mwenyekiti wa Kamati ya Usajili wa Simba, Zacharia
Hanspoppe alithibitisha mabadiliko hayo kwa Kapombe na kusema kuwa wao
wanaweka mbele maslahi ya Taifa na kuomba kusogezwa mbele kwa majaribio
hayo.
Hanspoppe alisema kuwa wamekwisha wasiliana na
wakala huyo ambaye hakutajwa jina kuhusiana na mabadiliko ya tarehe ya
kufanya majaribio na wamekubaliana naye.
“Sisi hatuna vipingamizi kwa Kapombe na mchezaji
mwingine yeyote ambaye atataka kwenda nje kufanya majaribio kwa sababu
tunajali masilahi yao, Taifa na klabu kwa ujumla, hatutaki
kung’ang’ania mchezaji ambaye timu nyingine zimeonyesha kumpenda.”
Alisema kuwa wao wanajiandaa vyema kwa ajili ya Ligi Kuu ya Tanzania Bara huku wakifanya usajili wao kwa uangalifu mkubwa.