Wakati Shirikisho la Soka Afrika (Caf) likiwateua waamuzi kutoka
Burundi kuchezesha mechi ya kwanza ya mchujo kuwania kucheza Fainali za
Kombe la Mataifa ya Afrika kwa Wachezaji wa Ndani (Chan) kati ya
Tanzania na Uganda, Fifa imefuta mechi ya kirafiki ya maandalizi ya
mchezo huo kati ya The Cranes na Timu ya Taifa ya Iran.
Fifa, Shirikisho la Kimataifa la Soka Ulimwenguni,
imefuta mchezo huo wa kirafiki wa kimataifa uliopangwa kuchezwa nchini
Iraq Jumanne wiki ijayo kwenye Uwanja wa Erbil City kwa sababu za
kiusalama.
Mechi hiyo ilipangwa kuchezwa Jumanne wiki ijayo
kwenye Uwanja wa Erbil City ambao umefungiwa na Fifa kwa muda
usiojulikana kutokana na shambulio la bomu.
Uganda iliomba kucheza mchezo huo kama sehemu ya
maandalizi kabla ya kuja Tanzania kucheza na Taifa Stars wiki ijayo,
ambapo timu itakayoibuka na ushindi katika mechi ya nyumbani na ugenini
itafuzu (Chan).
Makamu wa Rais wa Shirikisho la Soka la Uganda
(Fufa), Mujib Kasule alithibitisha jana taarifa za Fifa kuupiga ‘stop’
mchezo huo na kuagizwa uchezwe nchi nyingine.
Akizungumza jijini Dar es Salaam jana, Ofisa
Habari wa Shirikisho la Soka Tanzania (TFF) Boniface Wambura aliwataja
waamuzi hao kuwa ni Thierry Nkurunziza atakayepuliza filimbi, wakati
wasaidizi wake watakuwa Jean Claude Birumushahu na Pascal Ndimunzigo.
Pia alimtaja mwamuzi ambaye pia ni Mrundi kuwa ni
Pacifique Ndabihawenimana. Wambura alisema, kamishna wa mchezo huo
atakuwa Gebreyesus Tesfaye kutoka Eritrea, ambaye ni Mwenyekiti wa Chama
Soka Eritrea na mjumbe wa Kamati ya Maandalizi ya Mashindano ya Chan.
Katika hatua nyingine, Wambura alisema Caf imeteua
Mtanzania Leslie Liunda kuwa Kamishina wa mechi kati ya Burundi na
Sudan itakayopigwa Bujumbura.