TFF YAFYATA MKIA KWA RUKAMBURA NA WENZAKE, YAWAREJESHA KATIKA KINYANG'ANYIRO

Kamati ya Maadili ya Uchaguzi ya Shirikisho la Soka Tanzania (TFF) inayoongozwa na Jaji Steven Ihema imewarudisha wagombea saba walioenguliwa kwenye kinyang’anyiro cha uchaguzi na kamati ya uchaguzi ya TFF iliyo chini ya Hamidu Mbwezeleni.


Kamati hiyo iliyokutana juzi iliamua kuwarejesha wagombea wote kwenye uchaguzi kwa kile kilichoelezwa kuwa hawana hatia.

Wagombea ambao wamerudishwa kwenye kinyang’anyiro hicho ni Kilungeja Nazarius, Riziki Juma, Wilfred Kidau, Shaffih Dauda, Omary Abdukadir na Richard Rukambura.

Rukambura anayewania nafasi ya rais alienguliwa kwa kile kilichoelezwa kuwa alifungua kesi mahakamani kwenye uchaguzi wa awali uliofutwa akipinga kuenguliwa na Omary Nkwaruro aliyeenguliwa baada ya cheti chake kuwa na utata.

Dauda alienguliwa kwa kile kilichoelezwa kumiliki nyaraka za mawasilino za siri kati ya Tenga na Fifa na kuzisambaza kwenye mtandao wa kijamii, huku Kidau akienguliwa kwa kutumia nyaraka za kamati ya utendaji bila idhini.

Kwa upande wa Nazarius alienguliwa kwa madai ya kusababisha migogoro katika Chama cha Soka cha Rukwa, wakati Riziki Juma aliondolewa kwa kushindwa kusimamia kanuni za ligi akiwa mtendaji mkuu wa Chama cha Soka Mkoa wa Pwani (Corefa) kipindi cha ligi ya mkoa na mmoja wa wadau wa soka akafungua kesi mahakamani.

Abdukadir alienguliwa kwa kushindwa kuheshimu maagizo ya TFF waliposimamisha uchaguzi wa (FRAT).

Wagombea wote mbali na sababu nyingine walizotoa, pia walijitetea kuwa Fifa iliagiza mchakato wa awali ufutwe kila kitu na kuanza mchakato mwingine hivyo hawana hatia.